د افغاني سرې میاشتې سرپرست عمومي رئیس د کابل ولایت له والي سره وکتل
د افغاني سرې میاشتې سرپرست عمومي رئیس د کابل ولایت له والي سره وکتل
نن یکشنبه د جمادي الأول د میاشتې پر لومړۍ نېټه، د افغاني سرې میاشتې سرپرست عمومي رئیس ښاغلي شیخ الحدیث شهاب الدین دلاور په خپل کاري دفتر کې د کابل ولایت له والي الحاج ملا امین الله عبید سره لیدنه وکړه.
کتنه کې د افغاني سرې مياشتې سرپرست عمومي رٸيس د کابل ولایت ښاغلي والي ته د ښه راغلاست ويلو ترڅنګ د سرې مياشتې د فعاليتونو او بشرپاله خدمتونو په اړه خبرې وکړې چې ورپسې د کابل ولايت والي په خپلو خبرو کې د افغاني سرې میاشتې له سرپرست عمومي رئیس څخه وغوښتل، څو د کابل او ننګرهار ترمنځ په لویه لار د ترافیکي پېښو له امله زیانمنو او ټپیانو ته پر وخت د رسېدنې او ځواب وینې په موخه د سروبي په سيمه کې ثابت کلینیک جوړ کړي، ځکه ډېری وخت د ترافيکي پېښو ټپیان تر کابل یا ننګرهار پورې تر لېږدولو خپل ژوند د لاسه ورکوي.
د یادې غوښتنې په ځواب کې ښاغلي دلاور ډاډ څرګند کړ، چې نږدې راتلونکي کې به په یاده سیمه کې ثابت کلینیک جوړ او یاده ستونزه به حل کړي.
دا راز نوموړي د روغتيايي خدمتونو مسئول ته لارښوونه وکړه، چې د ثابت روغتيايي کلینیک تر جوړېدو پورې د سروبي سیمې ته يو ګرځنده روغتیایي ټیم وګماري، څو د ترافيکي پېښو ټپیانو ته پر وخت خدمات وړاندې کړي.
https://www.threads.net/@arcsafghanistan
