هلمند کې ۲۵۰ سېلاب ځپلو کورنیو ته غیر خوراکي توکي ورکړل شول
پنجشنبه، ۲۰ ذوالقعده ۱۴۴۷
د افغاني سرې میاشتې له لوري د هلمند ولایت په ګرمسېر، مارجې، سنګین او باباجي ولسوالیو کې ۲۵۰ سېلاب ځپلو کورنیو ته غیر خوراکي توکي ورکړل شول.
دغه مرسته د ملي ټولنو نړیوال فدراسیون په مالي ملاتړ برابره شوې وه، چې له مخې یې هرې کورنۍ ته یوه خېمه، ۷ کمپلې، ۲ ترپالونه، د پخلنځي د توکو یو سیټ او د اوبو ۲ بوشکې ورکړل شوې.
یاد توکي د سېلاب ځپلو کورنیو لپاره د لنډمهالې سرپناه د برابرولو او د لومړنیو اړتیاوو د پوره کولو په موخه ورکړل شول.
افغاني سره میاشت د طبیعي پېښو له امله د زیانمنو هېوادوالو لاسنیوی خپل بشري مسؤولیت بولي او هڅه کوي د بېړنیو مرستو له لارې د هغوی اساسي اړتیاوې پر وخت پوره کړي.
