بدخشان کې نن ۵۰۰ نورو کورنیو ته د افغاني سرې میاشتې له لوري مرسته وویشل شوه!
نن د جمعې په ورځ د روان ۱۴۰۰ لمریز کال د مرغومي پر ۱۷مه د بدخشان ولایت په وردوج ولسوالۍ کې د افغاني سرې میاشتې له لوري ۵۰۰ نورو جنګ ځپلو، وچکالۍ ځپلو او بې سرپرسته کورنیو ته د خوراکي توکو مرسته وویشل شوه.
په یاده مرسته کې ۸ قلمه مواد شامل دي، چې په کې ۱۰۰ کیلو اوړه، ۴۹ کیلو وریژې، ۱۴ کیلو لوبیا، ۱۰ کیلو بوره، ۴ کیلو مالګه، ۲ کیلو چای، دوه قطعۍ BP۵ بسکوټ او ۲۰ لیتره غوړي شتون لري.
دوه ورځې وړاندې هم په یاده ولسوالۍ کې د افغاني سرې میاشتې له لوري ۵۰۰ اړمنو کورنیو ته یاده مرسته ویشل شوې وه. په بدخشان ولایت کې په تېره اونۍ کې د افغاني سرې میاشتې له لوري ټولټال ۱۰۰۰ کورنیو ته مرسته ویشل شوې ده.
