۱۰۰ ټنه بشري مرسته؛ پکتیا کې د ١٠٠٠ راستنو شوو کورنیو لاسنیوی وشو
دوشنبه، ۱۵ رجب ۱۴۴۷
د افغاني سرې میاشتې د عمومي رئیس شیخ الحدیث شهاب الدین دلاور په لارښوونه، د پکتیا ولایت د مرکز ګردېز په ګډون په زرمت او روحاني بابا ولسوالیو کې له ۱۰۰۰ راستنو شوو کډوالو کورنیو سره ۱۰۰ ټنه د خوراکي او غیر خوراکي توکو مرسته وشوه.
یاده مرسته چې د ترکیې سرې میاشتې له لوري چمتو شوې وه، هرې کورنۍ ته په خوراکي توکو کې ۵۰ کیلو اوړه، ۱۰ کیلو وریژې، ۵ لیټره غوړي، ۱۰ کیلو نخود، ۵ کیلو بوره، ۱۰ کیلو مکروني، ۳ کیلو مالګه، ۳۵۰ ګرامه سرېلاک او په غیر خوراکي توکو کې ۱ کمپله او ۲ بوتله د لوښو مینځلو شامپو ورکړل شوه.
د دې مرستې په ترلاسه کولو سره به یادې کورنۍ وکولی شي، څو خپلې ورځنۍ چارې په ښه او منظم ډول پرمخ بوځي.
افغاني سره میاشت د خپلو اووه ګونو اصولو په رڼا کې د اړمنو، راستنو شوو کډوالو او پېښځپلو هېوادوالو لاسنیوي ته ژمنه ده.
