د افغاني سرې میاشتې سرپرست مرستیال ملا نورالدین ترابي د ناروې د سره صلیب له سکرتر جنرال سره ولیدل
نن یکشنبه د ۱۴۰۰ لمریز کال د سلواغې پر ۳مه د افغاني سرې میاشتې سرپرست مرستیال ملا نورالدین ترابي کابل کې د افغاني سرې میاشتې په مرکزي دفتر کې د ناروې هېواد د سور صلیب له سکرتر جنرال ښاغلي برنټ اپیلاند سره د افغاني سرې میاشتې په اړوندو موضوعاتو لیدنه ترسره کړه.
په دې لیدنه کې د ناروې د سره صلیب سکرتر جنرال ښاغلي برنټ اپیلاند له افغاني سرې میاشتې سره د روغتیا په برخه کې ګڼې ژمنې وکړې. نوموړي وویل، چې د ناروې سور صلیب به په ۲۰۲۲ کال کې د افغاني سرې میاشتې ۴۶ ثابتو کلینیکونو ته د اړتیا وړ هر ډول درمل ورکوي او له افغاني سرې میاشتې سره به د نورو ثابتو کلینیکونو په جوړولو کې رغنده مرکزي رول ترسره کوي.
ښاغلي برنټ اپیلاند ژمنه وکړه، چې دوی به په ۲۰۲۲ کال کې د افغاني سرې میاشتې د ټولو کلینیکونو د کارکوونکو معاش ورکوي. نوموړي د افغاني سرې میاشتې سرپرست مرستیال ملا نورالدین ترابي ته ژمنه ورکړه، چې د افغاني سرې میاشتې د ثابنو کلینیکونو ترڅنګ به د ګرځنده کلینیکونو د اکمالاتو، اکمالاتي موټرو او تنخواګانو په برخه کې هم ونډه واخلي او هم به له افغاني سرې میاشتې سره مرسته وکړي، چې څو نور ګرځند کلینیکونه رامنځ ته کړي. ښاغلي برانډ ژمنه وکړه، چې دوی به د افغاني سرې میاشتې ګرځنده کلینیکونو ته پینځه هغه موټر ورکړي، چې د ګرځنده کلینیکونو تنظیم په کې شوی. برنټ اپیلاند وویل، چې د ناروې سور صلیب به په ۲۰۲۲ کال کې ددې ټولو ترڅنګ کابل کې د افغاني سرې میاشتې په مرکزي روغتون کې د کورونا د څانګې بشپړ اکمال هم کوي.
په دې لیدنه کې د افغاني سرې میاشتې سکرتر جنرال ډاکتر محمد نبي برهان، د نړیوالو اړیکو رییس ښاغلی غلام حبیب حسام او د ناروې د سره صلیب د پېښو د مدیریت رییس مارکوزدیاز هم ګډون درلود. د افغاني سرې میاشتې د سرپرست مرستیال ملا نورالدین ترابي له لوري د ناروې د سره صلیب د ژمنو هرکلی وشو او ژمنه ورکړل شوه، چې دوی به په بشپړ شفافیت د ناروې هېواد روغتیایي مرسته اړمنو وګړو ته ورسوي.
