د کابل منتخب ټیم لپاره د پنګ بانک ۱۲ پړاویزې سيالۍ پای ته ورسیدې!
نن شنبه د روان ۱۴۰۰ هجري لمريز کال د ليندۍ پر ۶مه نېټه د کابل منتخب ټيم لپاره ۱۲ پړاویزې پنګ پانګ سیالۍ چې ټولټال ۷ ټيمونو او ۴۰ تنو لوبغاړو په کې ګډون درلود د افغاني سرې میاشتې ټولنې په اتلولۍ پای ته ورسېدې.
په دې اړوند په جوړ شوي محفل کې د افغاني سرې میاشتې ټولنې سرپرست رییس الحاج مولوي مطیع الحق خالص، د المپيک ملي کمېټې او بدني روزنې رییس انجينر نظر محمد مطمین او د سپورت او بدني روزنې یو شمېر مينه والو ګډون کړی و.
د سرې میاشتې سرپرست رییس مولوي مطیع الحق خالص د المپيک ملي کمېټې رییس او ګډونوالو ته د ښه راغلاست ترڅنګ د افغاني سرې میاشتې تولنې د ورزشکارانو له غوره کارکردګۍ ستاینه وکړه او دوی یې په راتلونکي کې منظم او دوامداره ورزش ته وهڅول. نوموړي وویل، چې ورزش د صحت او سلامتۍ ضامن دی او سلیم عقل په سالم وجود کې وي.
ورپسې د المپيک ملي کمېټې رییس انجينر نظر محمد مطمین د افغاني سرې میاشتې ټولنې له رهبرۍ مننه وکړه، چې د دولسم پړاو سیالیو په برابرولو کې یې هر اړخیزه مرسته ترسره کړې ده. نوموړي همدا راز په ټولو ورزشکارانو غږ وکړ ترڅو له ځان سره یوځای نور ځوانان هم ورزش ته وهڅوي.
په پای کې د افغاني سرې میاشتې ټولنې د واليبال، فوټبال او تکواندو ټیمونو له لوري نمایش وړاندې شو او د لومړي، دویم او درېیم مقام ګټونکو ته د ستاینليکونو په ورکولو پروګرام د اتلولۍ د کپونو په وېش پای ته ورسېد.
