هرات؛ د افغاني سرې میاشتې مرستیال د روغتیايي خدمتونو او ملکیتونو وضعیت وارزاوه
پنجشنبه، ۲۵ ذوالحجه ۱۴۴۷
د افغاني سرې میاشتې مرستیال، ښاغلي حافظ عزیزالرحمن، هرات ته د خپل سفر په لړ کې د یاد ولایت د رواني ناروغانو د ساتنې او درملنې له مرکز، د حضرت ابوبکر صدیق بنسټیز کلینیک، د مرستون د داخلي مشمولینو له استوګنځایونو او د افغاني سرې میاشتې له ملکیتونو څخه لیدنه وکړه.
د لیدنې پر مهال ښاغلي حافظ عزیزالرحمن په یادو مرکزونو کې د ترسره کېدونکو فعالیتونو، ناروغانو او داخلي مشمولینو ته د وړاندې کېدونکو خدمتونو د کیفیت او د روغتیايي او اداري چارو د بهیر ارزونه وکړه او د مسؤولینو او کارکوونکو هڅې یې وستایلې.
نوموړي روغتیايي او اداري کارکوونکو ته د چارو د لا ښه ترسره کېدو، له ناروغانو سره د ښه او نېک چلند او د معیاري او پر وخت خدمتونو د وړاندې کولو په اړه لازمې لارښوونې وکړې.
همدارنګه، ښاغلي مرستیال د مسؤولینو او کارکوونکو ستونزې واورېدې او د حل ډاډ یې ورکړ.
نوموړي د هرات ښار د خواجه عبدالله انصاري او باغ ملت سړکونو په اوږدو کې د افغاني سرې میاشتې له ځمکو او ملکیتونو څخه هم لیدنه وکړه او د دغو شتمنیو د ساتنې، اغېزمنې استفادې او غوره مدیریت په اړه یې مسؤولینو ته اړینې سپارښتنې هم وکړې.
