بادغیس کې د ۳.۲ میلیونه افغانیو په ارزښت د کانال جوړولو پروژه پیل شوه
یکشنبه، ۲۵ صفر ۱۴۴۸
د افغاني سرې میاشتې له لوري د بادغیس ولایت د مرکز اړوند د باغک په کلي کې د سېلابونو له امله د رامنځته کېدونکو زیانونو د مخنیوي په موخه د ۳.۲ میلیونه افغانیو په ارزښت د اوبو کانال د جوړولو چارې پیل شوې.
د پروژې له مخې به ۱۵۰ متره اوږد او ۱.۹ متره لوړ د اوبو کانال جوړ شي، چې چارې به یې د ۲۰ کاري ورځو په موده کې بشپړې او ګټې اخیستنې ته وسپارل شي.
د پروژې د پلي کېدو پر مهال به ۱۲۰ تنه مسلکي او غیرمسلکي محلي کاریګر په دندو وګومارل شي، چې له امله به یې د سیمې یو شمېر خلکو ته د لنډمهالې کارموندنې زمینه هم برابره شي.
دغه پروژه د سره صلیب نړیوالې کمېټې په مالي ملاتړ پلي کېږي، چې موخه يې د سېلابونو له زیانونو څخه د خلکو د کرنيزو ځمکو ساتنه او د سیمې خلکو د معیشت ملاتړ دى.
افغاني سره میاشت د طبیعي پېښو د خطرونو د کمولو ترڅنګ، د ټولنو د مقاومت وړتیا د پیاوړتیا لپاره هم دوامداره هڅې کوي.
