ناروې کې د افغاني سرې میاشتې سرپرست رییس له نړیوالو وغوښتل چې بشري مرستې په سیاست پورې ونه تړي
د روان ۱۴۰۰ لمریز کال د سلواغې پر ۴مه د افغاني سرې میاشتې سرپرست رییس مولوي مطیع الحق خالص د ناروې هېواد په پلازمېنه اوسلو کې د افغانستان په اړه په جوړه شوې غونډه کې پر نړیوالو غږ وکړ، چې بشري مرستې په سیاست پورې ونه تړي او له سیاست وراخوا له افغانستان سره پراخې بشري مرستې وکړي.
نوموړي له نړیوالو وغوښتل، چې که دوی غواړي افغانستان ته بشري مرستې ولېږي او له شفاف ویش څخه یې ډاډمن واوسي، نو غوره ده چې خپلې نغدي او جنسي مرستې د افغاني سرې میاشتې له لارې افغانستان ته داخلې کړي.
د افغاني سرې میاشتې سرپرست رییس نړیوالو ته ډاډ ورکړ، چې د دوی مرستې به د افغاني سرې میاشتې له لوري په بشپړ شفافیت او امانتدارۍ اړمنو ته رسېږي. نوموړي په تېرو څه باندې پینځه میاشتو کې د افغاني سرې میاشتې له لوري اړمنو کورنیو ته په بې ساري ډول د مرستو د ویش یادونه وکړه او ویې ویل، چې افغاني سرې میاشتې په تېرو پینځه میاشتو کې شاوخوا دوه څلوېښت زره کورنیو سره د خوراکي او غیر خوراکي توکو مرسته کړې او هڅه کوي، چې په افغانستان کې اړمنو کورنیو ته د مرستو ویش لا پراخ او ډېر کړي.
