د افغاني سرې میاشتې ټولنې د ۲۰۲۱ ــ ۲۰۲۵ کال د ستراتیژیک پلان د بشپړونې ورکشاپ!
د افغاني سرې میاشتې ټولنې د ۲۰۲۱ مالي کال څخه تر ۲۰۲۵ مالي کال پورې د ستراتیژیک پلان پر مسوېدې پنځه ورځنی ورکشاپ د افغاني سرې میاشتې ټولنې د مرستیال او سرپرست ښاغلي ډاکتر میرویس اکرم، سکرترجنرالې آغلې ډاکتر نیلاب مبارز، د ملي ټولنې د بورد غړي او د ټولو خزاندار ښاغلي محمد نعیم دیندار، په افغانستان کې د نړیوال سره صلیب، د سره صلیب او سرې میاشتې د نړیوال فدراسیون د درنو استازو، د ملي ټولنې د مرکزي دفتر، سیمه ایزو دفترونو او اړوندو څانګو مسؤلینو په ګډون د ۱۳۹۹ لمریز کال د سلواغې میاشتې پر څلوره نیټه په لاره واچول شو.
ورکشاپ د ملي ټولنې د مرستیال او سرپرست ښاغلي ډاکټر میرویس اکرم په خبرو پیل شو، چې د ستراتیژیک پلان پر ارزښت یې مفصلې او هر اړخیزې خبرې وکړې. ورپسې د ملې ټولنې سکرټرجنرالې آغلې ډاکټر نیلاب مبارز د ستراتیژیک پلان پر موخو او همدارنګه د افغاني سرې میاشتې ټولنې د ستراتیژیک پلان پر تیرو پړاوونو خبرې وکړې او دا یي د ملي ټولنې لپاره یو لاسته راوړنه و بلله.
د ستراتیژیک پلان د پرمخ تګ د پروسې په اړه د ملي ټولنې په حمایوي عملیاتي چارو کې د سکترجنرال مرستیال ښاغلي نوروزعلي علیزاده ګډون والو ته مالومات ورکړل، چې ورپسې د ستراتیژیک پلان یاده مسوده د پلان او ستراتیژۍ په برخه کې د افغاني سرې میاشتې ټولنې د مرستیال سکرترجنرال ښاغلي ډاکتر محمد نبي برهان له لوري تشریح او د ګروپي کار لپاره وړاندي شوه، چې راتلونکي څلور ورځې به هر اړخیز ګروپي کارونه ورباندې وشي او د اصلاح په موخه به یې اصلاحي طرحې او اندونه پکي ځای پرځای او یاد پلان به بشپړ شي.
