د افغاني سرې میاشتې سرپرست عمومي رئیس او د قطر فنډ د پرمختیايي پروژو مسؤل دوحه کې دوه اړخیزه ناسته وشوه!
د افغاني سرې میاشتې سرپرست عمومي رئیس ښاغلي مولوي مطیع الحق خالص او د قطر فنډ د پرمختیايي پروژو مسؤل ښاغلي سلطان بن احمد العسیري ترمنځ دوحه کې افغانستان کې پر بشري مرستو، روغتیایي خدماتو، د بې سرپرسته کورنیو پر لاسنیوي او یو شمېر نورو موضوعاتو دوه اړخیزه ناسته وشوه. ناسته کې د افغاني سرې میاشتې سرپرست عمومي رئیس وویل "افغانستان ۴۰ کلنو جګړو له هر اړخه ځپلی او لاسنیوي ته اړتیا لري؛ له مرسته کوونکو بنسټونو مو هیله ده د افغانانو لاسنیوی وکړي او د بېوزلو افغانانو ترڅنګ ودرېږي". نوموړي وویل "له افغاني سرې میاشتې سره د سوري زړه په ناروغۍ د اخته ماشومانو د ثبت شمېره په لوړېدو ده، چې افغاني سره میاشت یې په یوازې ځان توان نه لري؛ زمونږ هیله ده بشرپال بنسټونه افغاني سرې میاشتې ته لاس ورکړي؛ ترڅو د سوري زړه په ناروغۍ د اخته ماشومانو د درملنې وس ومومي". ښاغلي مولوي مطیع الحق خالص له قطر فنډ هیله وکړه، چې د بې سرپرسته کورنیو د لاسنیوي او د رواني ناروغانو درملنه او ساتنه کې افغاني سرې میاشتې ته د همکارۍ لاس ورکړي او افغانستان کې د وړو د مرستې پروژه د سرې میاشتې له لارې پلې کړي. د قطر فنډ د پرمختیايي پروژو مسؤل ښاغلي سلطان بن احمد العسیري د افغاني سرې میاشتې د فعالیتونو د ستاینې ترڅنګ یادو برخو کې افغاني سرې میاشتې ته د لاس ورکولو ډاډ څرګند کړ او ویې ویل "مونږ له افغانانو سره د مرستې هیله لرو او هڅه کوو، چې د افغاني سرې میاشتې له لارې د افغانانو لاسنیوی وکړو او د زرګونو ټنو اوړو د مرستې پروژه د افغاني سرې میاشتې له لارې تنظیم او پلې کړو".
