کندهار کې د افغاني سرې میاشتې له لوري ۱۵۰ اړمنو کورنیو سره مرسته وشوه!
کندهار ولایت کې نن د ۱۴۰۰ لمریز کال د مرغومي پر ۱۱مه نېټه پر ۱۵۰ جنګ ځپلو، وچکالۍ ځپلو، بې ځایه شویو او بې سرپرسته کورنیو د افغاني سرې میاشتې له لوري د پاکستان هېواد او UNFPA له لړري رالېږلې مرسته وویشل شوه. په یاده مرسته کې ۱۰ کیلو اوړه، ۳ کیلو وریژې، ۱ کیلو بوره، ۱ کیلو غوړي، یوه کمپله، صابون او نور توکي شامل دي.
تېره اونۍ هم کندهار ولایت کې د افغاني سرې میاشتې له لوري ۲۴۹ کورنیو ته د خوراکي توکو یاده مرسته ویشل شوې وه.
له دې وړاندې د پاکستان پر رالېږلې مرسته سربېره په تېرو درې اونیو کې د کندهار ولایت په نهمه ناحیه کې هم ۴۰۰۰ نورو اړمنو کورنیو ته د نړیوال فدراسیون له لوري د خوراکي توکو چمتو شوې مرستې ویشل شوې وې.
