د پنجشير ولايت ۱۰۰۰ بيځايه شويو کورنيو ته د خوراکي توکو مرسته!
ښاغلي مولوي صفت الله قريشي د افغاني سرې مياشتې ټولنې د عمومي رياست سرپرست او ورسره مل پلاوي د ۱۴۰۰ کال د وږي مياشتې په ۲۸ مه نيټه د پنجشير ولايت ۳۳۰ کورنۍ چې د جګړې له امله بيځايه شوې وې؛ اوه قلمه خوراکي توکي چې په هغه کې(وريځې، لوبيا، غوړي، بسکيټ، چای، بوره او مالګه) شامل دي د کابل د سرې مياشتې د نمايندګې له لارې وويشل شول. دا په داسې حال کې دی چې ۶۷۰ نورو کورنيو ته هم د نوموړو توکو د ويش لړۍ روانه ده.
د افغاني سرې مياشتې ټولنې د عمومي رياست سرپرست ښاغلی مولوي سيد صفت الله قريشي د ملي ټولنې د مرستو د ويش او سروې له بهير څخه د روڼتيا ډاډ ورکړ او د نورو ملي مماثلو ټولنو او د ملي او نړيوالو مؤسساتو څخه د لا زياتو مرستو او ملاتړ جلبولو غوښتنه وکړه.
