د افغاني سرې میاشتې ټولنې سره د ملک سلمان خیریه بنسټ له لوري د «۱۰۰» ټنه خورما مرسته وشوه !
نن یک شنبه د روان ۱۴۰۰ لمریز کال د وري پر ۲۲ نیټه د افغاني سرې میاشتې ټولنې د سرپرست ریسې آغلې ډاکتر نیلاب مبارز، د سعودي عربستان سفارت د شارزدافیر او ملک سلمان خیریه بنسټ د رئیس ښاغلي بدر طیبي، سرې میاشتې د سکرترجنرال د مرستیال ښاغلي نوروزعلي علیزاده او مرکزي دفتر د یو شمیر ریسانو په شتون کې د یاد خیریه بسټ له لوري ۱۰۰ ټنه مرسته شوي خورما، افغاني سرې میاشتې تولنې ته تسلیم او اړمنو کورنیو ته یې د ویش لړۍ پیل شوه.
آغلې ډاکتر نیلاب مبارز د خورما د ویش پر مهال و ویل: یاده ۱۰۰ ټنه خورما، چې ۵۰۰۰ کارتنه کیږي سر له ننه یې د هیواد په ولایتونو او مرکز کې ۵۰۰۰ کورنیو ته د وېش لړۍ پیل شوه، چې په څو لنډو ورځو کې به بشپړه شي.
د ملک سلمان بنسټ مشر ښاغلي بدر طیبي د خپلو خبرو په ترڅ کې زیاته کړه: « د ملک سلمان خیریه بنسټ او همدارنګه د سعودي عربستان هیواد تل هڅه کوي، ترڅو د افغانستان له خلکو او افغاني سرې میاشتې ټولنې سره د بشري ستونزو په راکمولو او اړمنو وګړو په لاسنیوي کې مرسته وکړي، چې د رمضان د مبارکې میاشتې له رارسیدو سره مو دا ۱۰۰ ټنه خورما افغاني سرې میاشتې ټولنې ته تسلیم کړه، چې د مرستو دالړۍ به دوام ولري».
