د افغاني سرې میاشتې له لوري بغلان کې ۲۰۰ نورو کورنیو ته هم د خوراکي توکو مرسته وویشل شوه!

نن د روان ۱۴۰۰لمریز کال د لیندۍ پر ۲۴مه د بغلان ولایت په مرکزي بغلان ولسوالۍ کې د افغاني سرې میاشتې له لوري له هغو ۶۰۰ کورنیو ۲۰۰ کورنیو ته د خوراکي توکو مرسته وویشل شوه، چې څه موده مخکې د افغاني سرې میاشتې د سروې د ټیم له لوري د وچکالۍ ځپلو د سروې په ترڅ کې یې سروې شوې وه. یاده مرسته نن د شمال ختیځ زون لپاره د سرې میاشتې د رییس انجینر احمد فرید، په بغلان ولایت کې د سرې میاشتې د رییس ډاکتر جان محمد او یو شمېر نورو کارکوونکو په شتون کې وویشل شوه. ټاکل شوې، چې په یاده ولسوالۍ کې پاتې ۴۰۰ نورو سروې شویو کورنیو ته به هم زر یاده مرسته وویشل شي.

څلور ورځې وړاندې هم د افغاني سرې میاشتې ټولنې له لوري د بغلان  ولایت د دهنه غوري ولسوالۍ د بېخ او شاوخوا نورو کلیو ۶۰۰ اړمنو کورنیو ته مرسته ویشل شوې وه. په یادو مرستو کې ۸ قلمه خوراکي توکي شامل دي، چې ۵۰ کیلو اوړه، ۲۵ کیلو وریژې، ۱۰ لیتره غوړي، ۱ کیلو شین چای، ۵ کیلو بوره، ۷ کیلو لوبیا ، ۲ کیلو مالګه او یو ډبی BP5 بیسکویټ  شامل دي، چې د سره صلیب او سرو میاشتو نړېوال فدرېشن په مرسته چمتو شوي.