د افغاني سرې میاشتې سرپرست عمومي رئيس د ناروې د سره صلیب له سکرتر جنرالې سره وکتل
د افغاني سرې میاشتې سرپرست عمومي رئيس د ناروې د سره صلیب له سکرتر جنرالې سره وکتل
نن سه شنبه د جمادي الأولی د میاشتې پر ۱۷مه، د افغاني سرې میاشتې سرپرست عمومي رئيس ښاغلي شیخ الحدیث شهاب الدین دلاور او د نوموړي مرستیال ښاغلي حافظ عزیز الرحمن د ناروې د سره صلیب له سکرتر جنرالې آغلې انابرګ او مل پلاوي سره په خپل کاري دفتر کې د همغږۍ ناسته ترسره کړه.
ناسته کې د افغاني سرې میاشتې سرپرست عمومي رئيس ددې خيريه ملي ټولنې د روغتیايي خدماتو په تړاو د افغاني سرې میاشتې د مرکزي روغتون، د سوري زړه ماشومانو او رواني ناروغانو د درملنې ترڅنګ المان هېواد ته د میکروبي هډوکو او په اور د سخت سوځېدلیو ناروغانو د لېږد په برخه کې هر اړخيز او تفصیلي معلومات وړاندې کړل، نوموړي په خپلو خبرو کې له یاد پلاوي څخه په افغانستان کې د اقليمي بدلون او طبیعي پېښو له امله د زیانمنو د ملاتړ او د ژمي په موسم کې د کډوالو او ناچاره وګړو د لاسنیوي په پار د بېړنیو او اړینو مرستو برابرولو غوښتنه وکړه او دې برخه کې یې د کورنیو او بهرنيو مرستندویه بنسټونو مرستې اغېزمنې یادې کړه.
ورپسې د ناروې د سره صلیب سکرتر جنرالې د افغاني سرې میاشتې بشرپال خدمات د ناچاره وګړو لپاره موثر او اغیزمن وبلل او د ګډو هڅو او دوامداره مرستو ترسره کولو ژمنه یې وکړه، نوموړې د بشرپالو فعالیتونو په ترسره کولو کې د افغاني سرې میاشتې او ناروې سور صلیب ګډه همکاري مهمه وبلله.
