د افغاني سرې میاشتې رهبرۍ د ناروې له سور صلیب او د سور صلیب له نړیولې کمیټې سره ناسته ترسره کړه!
نن یکشنبه د روان ۱۴۰۱ لمریز کال د وري پر ۱۴مه نېټه د افغاني سرې میاشتې ټولنې په مرکزي دفتر کې د افغاني سرې میاشتې سرپرست عمومي رئیس ښاغلي مولوي مطیع الحق خالص او سکرتر جنرال ډاکتر محمد نبي برهان د سره صلیب د نړیوالې کمېټې له رئیس ایلوي فلیون، د آسیایي هېوادونو لپاره د ناروې د سره صلیب مرستیال ویني ایډ وارډ، په کابل کې د ناروې د سره صلیب استازي هیومن او د سره صلیب د نړیوالې کمېټې د کوپرېشن له مسوولې سره ناسته ترسره کړه.
په پیل کې د افغاني سرې میاشتې سرپرست رئیس ښاغلي مولوي مطیع الحق خالص راغلو مېلمنو ته د ښه راغلاست ترڅنګ له نوموړو د ګډې همکارۍ په اړه د مالوماتو غوښتنه وکړه.
په مقابل کې د سره صلیب د نړیوالې کمېټې رئیس د ګډې همکارۍ په اړه هر اړخیز مالومات وړاندې کړل او زیاته یې کړه، چې د نننۍ ناستې موخه له افغاني سرې میاشتې ټولنې سره د سره صلیب د نړیوالې کمیټې او د ناروې د سره صلیب د ګډې همکارۍ، تړونونو او کړنو په هکله د مالوماتو شریکول او د پخوانیو تړونونو لا پیاوړتیا او ملاتړ دی. نوموړو وویل د ناروې د سور صلیب او د سور صلیب د نړیوالې کمیټې ترمنځ په ګڼو هېوادونو کې خپلمنځي دوه اړخیز تړونونه شوي او اوس مونږ غواړو په افغانستان کې هم د سور صلیب د نړیوالې کمیټې او د ناروې د سور صلیب تر منځ ورته تړون وشي، چې ددې تړون له مخې به د سفر پر مهال د ناروې د سره صلیب د کارکوونکو امنیت خوندي کېږي او هم به ددې تړون له مخې دواړه لوري د روغتیا په برخه کې لازمه همکاري کوي. همدا راز غواړو په ټولو هغو برخو کې چې اړتیا وي د ستونزو د حل په موخه ګډ ګامونه واخلو.
په پای کې د افغاني سرې میاشتې سرپرست رئیس د نوموړو له دې اقدامه هرکلی وکړ او په راتلونکي کې د لا همغږۍ په موخه د درې اړخیزو ناستو په دایرولو پرېکړه وشوه.
