د غورځنګ د غړو د همغږۍ درې اړخیزه ناسته د افغاني سرې میاشتې ټولنې د سرپرست رییس په دفتر کې ترسره شوه!
د افغاني سرې میاشتې سرپرست رییس مولوي مطیع الحق خالص نن د ۱۴۰۰ لمریز کال د لړم په ۲۵مه په خپل کاري دفتر کې په افغانستان کې د سرې میاشتې او سور صلیب د نړیوال فدراسیون له رییس نیسفوړ، مرستیال نیلسن او د موسسوي پراختیا مسوول محمد یاسین حسیني,د سره صلیب نړیوالې کمېټې د کوپرېشن سرپرسته میرمن کترين او د یادی ادارې غړي زبيح الله اميني سره د سرې میاشتې پر اړوند موضوعاتو لیدنه وکړه. په دې لیدنه کې پر ګڼو مسایلو سربېره د فدراسیون له لوري په را روانه اونۍ کې د ۵۰۰۰ خوراکي بستو په مرسته، د سرې میاشتې نویو ګومارل شویو افرادو ته د معلوماتي ورکشاپ پر چمتو کولو او پر انټرنیټي تخنیکي امورو خبرې وشوې.
د سرې میاشتې سرپرست رییس محترم مولوي مطیع الحق خالص د ناستې ګډونوالو ته وویل، چې دوی چمتووالی نیولی، چې په را روانه اونۍ کې د نړیوال فدراسیون له لوري دوی ته د ۵۰۰۰ خوراکي بستو له رسېدو سره سم به یې اړمنو کورنیو ته ورسوي.
نوموړي وویل چې دوی به له نړیوال فدراسیون سره د سرې میاشتې د انټرنیټي تخنیکي مشکلاتو د حل په برخه کې ګډ کار وکړي او خوښ به شي، چې یاده ستونزه حل شي. نوموړي وویل چې دوی ته له اشخاصو د سرې میاشتې پرمختګ لومړیتوب لري، نو ځکه په اړه له دقت کار واخلي.
