د افغاني سرې میاشتې سرپرست عمومي رییس د منځنۍ آسیا لپاره د ناروې له مسوولې او د پاکستان د سرې میاشتې له سکرتر جنرال سره لیدنه ترسره کړه!
د افغاني سرې میاشتې سرپرست عمومي رییس محترم مولوي مطیع الحق خالص د روان ۱۴۰۰ لمریز کال د لیندۍ پر ۲۳مه، چې له ۶/۵/۱۴۴ سپوږمیزې نېټې سره سمون خوري؛ پاکستان هېواد ته د خپل سفر په ترڅ کې د پاکستان سرې میاشتې ټولنې سکتر جنرال او د ناروې د سره صلیب د منځنۍ آسیا عمومي مسوولې او ورسره پلاوي سره د هلال احمر پاکستان مرکزي دفتر کې لیدنه ترسره کړه.
په دې لیدنه کې د افغانستان د خلکو پر ستونزو او ورسره د مرستو پر پراختیا او زیاتولو خبرې وشوې. د ناروې له لوري د منځنۍ اسیا عمومي مسوولې د افغاني سرې میاشتې سرپرست عمومي رییس ته ډاډ ورکړ، چې خپله توجه او پام به په دې اړه لا زیات کړي او مرستو ته به پراختیا ورکړي.
همدا راز د پاکستان د سرې میاشتې سکرتر جنرال ښاغلي ډاکټر عدیل نواز د افغاني سرې میاشتې ټولنې سرپرست عمومي رییس محترم مولوي مطیع الحق خالص ته ډاډ او ژمنه ورکړه، چې د صعب العلاج او د زړه په سوري اخته افغان ماشومانو د درملنې په موخه به له هیڅ نوعه مرستو درېغ ونکړي او په لومړي ګام کې به د یو شمېر ماشومانو اسناد مطالعه او وروسته به یې عملا د درملنې چارې بشپړې کړي.
