په کابل کې له «۱۰۰» کورنیو سره د افغاني سرې میاشتې ټولنې له لورې د خوراکي توکو مرسته!
د افغاني سرې میاشتې ټولنې د سرپرست رئیس ښاغلي مولوي سید صفت الله قریشي او په افغانستان کې د ترکیې هیواد سفیر ښاغلي جهاد ارګین ای د سرې میاشتې د کابل څانګې له لوري ۱۰۰ اړمنو او بې بضاعته کورنیو ته د ترکي سرې میاشتې په مرسته څلور قلمه خوراکي توکي: «اوړه، وریژې، غوړي او مکروني» و وېشل.
په پیل کې د افغاني سرې میاشتې ټولنې عمومي رئیس ښاغلي مولوي سیدصفت الله قریشي د ترکیې هیواد سفیر ته د ګلونو د ګیډۍ په ورکولو سره ښه راغلاست و ویل او د یوې ناستې په ترڅ کې یې د یاد هیواد له دوامداره مرستو څخه د مننې ترڅنګ د یادو مرستو د لا پراختیا او دوام غوښتنه وکړه.
بل پلو د ترکیې هیواد سفیر ښاغلي جهاد ارګین ای د افغاني سرې میاشتې ټولنې د سرپرست په توګه ښاغلي مولوي سید صفت الله قریشي ته مبارکه ورکړه او ژمنه یې وکړه، چې د افغاني سرې میاشتې ټولنې او افغانستان له کړاو ځپلوو وګړو سره به خپلو مرستو ته دوام ورکوو. نوموړي هیله مندي وښوده ترڅو د افغاني سرې میاشتې ټولنې له ولایتي استازولیو څخه هم لیدنه وکړي، چې د سرې میاشتې د رئیس له لوري ورته ښه راغلاست و ویل شول.
همدارنګه یې د افغاني سرې ټولنې رئیس او ورسره ټیم ته د ترکیې په سفارت کې د مېلمستیا بلنه ورکړه چې د مولوي سیدصفت الله قریشي له لوري قبوله او د ترکیي هیواد سفیر یې هم د افغاني سرې میاشتې ټولنې ته را دعوت کړ.
