د سعودي عربستان له لوري ۶ الوتکې مرسته افغاني سرې میاشتې ته وسپارل شوه!
نن د ۱۴۰۰ لمریز کال د لیندۍ پر ۲۷مه د سعودي عربستان د ملک سلمان خیریه بنسټ له لوري د کابل په نړیوال هوایي ډګر کې د افغاني سرې میاشتې سرپرست عمومي رییس مولوي مطیع الحق خالص ته په کابل کې د سعودي عربستان د سرپرست سفیر مشعل، افغانستان کې د ملک سلمان خیریه بنسټ د مشر فهاد سعد القحطاني او د ملک سلمان د خیریه بنسټ د بېړنیو مرستو د مشر فهد العصيمي په شتون کې دوه الوتکې نوره خوراکي او غیر خوراکي مرسته هم افغاني سرې میاشتې ته وسپارل شوه.
سعودي عربستان په تېرو درې ورځو کې هره ورځ دوه الوتکې مرسته کابل ته را انتقال او افغاني سرې میاشتې ته وسپارله، چې نن د دوه الوتکې مرستې په را رسېدو د مرستو اندازه ۶ الوتکو ته ورسېده. په یادو ۶ الوتکو کې ۱۹۷ ټنه خوراکي او غیر خوراکي مرسته راوړل شوې ده.
د سعودي عربستان د ملک سلمان خیریه بنسټ له لوري افغاني سرې میاشتې ته په دې سپارل شوې مرسته کې اوړه، بوره، غوړي، خرما، نخود، وریژې، د پخلنځي لوښي، فرش، ترپال، پشه خانه او یو شمېر نور توکي شامل دي.
ټاکل شوې چې د ملک سلمان خیریه بنسټ له لوري به په نېږدې ورځو کې ۲۰۰۰ ټنه نوره مرسته د یاد خیریه بنسټ له لوري د ځمکې له لارې د تورخم په دروازه کې افغاني سرې میاشتې ته سپارل کېږي.
ټاکل شوې، چې د ملک سلمان خیریه بنسټ له لوري افغانستان ته ټوله را روانه مرسته به افغاني سرې میاشتې ته ورکول کېږي او د افغاني سرې میاشتې له لوري به د هېواد په ګوټ ګوټ کې بېوزلو هېوادوالو ته ویشل کېږي.
