انجینر مصطفی د سرې میاشتې د لويديځ زون د رئیس په توګه وټاکل شو!
د افغاني سرې میاشتې ټولنې د سرپرست رئیس ښاغلي مولوي مطیع الحق خالص له حکم سره سم د روان ١٤٠٠ لمریز کال د لړم پر ۱۵مه نېټه د ۱۴۴۳ هجري قمري کال د ربیع الثاني له لومړي نیټې سره سم ښاغلی انجینر مصطفی د سرې میاشتې د لويديځ زون د رئیس په توګه د مولوي فضل الرحمن فیاض او د يادې نماینده ګۍ د کارکوونکو، رضاکارانو او اعضاوو په شتون کې د یو لړ مراسمو په ترڅ کې معرفي شو.
غونډه د قرانکریم د څو مبارکو آیتونو په تلاوت پیل او وروسته ښاغلي مولوي فیض الرحمن فیاض ګډونوالو ته د ښه راغلاست تر څنګ د ملي ټولنې د سرپرست رییس پيغام واوراوه او په ملي ټولنه کي یې چې د خیر او بشردوستۍ اداره ده؛ له ګمارنې مننه وکړه.
ورپسې د یاد ریاست پخواني رییس ښاغلي احمد الله افضلي د ملي ټولنې د سرپرست رییس ښاغلي مولوي مطیع الحق له ګمارنې خوښي وښوده او نوي ګمارل شوي رییس ته یې په ورځنیو چارو کې د بریاوو هیله وکړه.
همدا راز انجینر مصطفی د سرې میاشتې د لويديځ زون له پخواني رئیس او د سرې میاشتې او یادې ټولنې له کارکوونکو له تېرو کړنو د مننې ترڅنګ ژمنه وکړه، چې په خپلو بشرپالو خدماتو کې به له هیڅ ډول مرستې درېغ او سپما ونکړي.
په غونډه کې د هرات د سرې میاشتې پخواني رییس قاري میر ګلاب الدین د ښاغلي افضلي له لوري پر ۱۴ کلنو کړنو رڼا واچوله او غونډه د خیر په دعائې سره پای ته ورسیده.
