کابل؛ ۴۶ ناروغ ماشومان له درملنې وروسته هېواد ته راستانه او ۷۹ نور د درملنې په موخه المان ته واستول شول
چهارشنبه، ۲۳ جمادی الأولى ۱۴۴۸
د افغاني سرې میاشتې په هڅو او د المان د سولې کلي خیریه بنسټ په مالي ملاتړ ۴۶ تنه هغه ناروغ ماشومان چې د سختو سوځېدنو او د هډوکو د میکروبي ناروغیو د درملنې لپاره المان ته لېږدول شوي وو، له بشپړې درملنې وروسته بېرته هېواد ته راستانه شول او ۷۹ تنه نور ناروغ ماشومان د لا زیاتو او تخصصي درملنو په موخه المان ته واستول شول.
په همدې مناسبت په کابل هوايي ډګر کې د جوړو شویو مراسمو پر مهال د افغاني سرې میاشتې مرستیال حافظ عزیزالرحمن د المان د سولې کلي خیریه بنسټ له همکارۍ او ملاتړ څخه مننه وکړه او د یادو ماشومانو درملنه یې یو مهم بشري اقدام وباله.
نوموړي د درملنې له بشپړېدو وروسته د ۴۶ ماشومانو د بېرته راستنېدو له امله خوښي څرګنده کړه او المان ته د درملنې لپاره د لېږل شویو ماشومانو د ژر رغېدو او بشپړې روغتیا هیله یې وکړه.
دغه راز، د ماشومانو د بېرته سپارلو په مناسبت جوړې شوې غونډې ته د افغاني سرې میاشتې ټولنې عمومي رئیس شیخ الحدیث شهاب الدین دلاور د وینا پر مهال د المان د سولې کلي خیریه بنسټ له هر اړخیزو همکاریو او ملاتړ څخه مننه وکړه.
نوموړي وویل تر دې دمه په المان کې د شاوخوا ۵۰۳۰ تنو هغو ماشومانو درملنه شوې چې د هډوکو په میکروبي ناروغیو اخته او یا د اور له امله سخت سوځېدلي وو. هغه وویل اوس مهال د تازه لېږل شویو ماشومانو په ګډون ۱۵۳ تنه ناروغ ماشومان په المان کې تر درملنې لاندې دي.
د افغاني سرې میاشتې عمومي رئیس د رغېدلو ماشومانو کورنیو ته د هغوی د روغتیا مبارکي وویله او د پاتې ناروغانو لپاره یې د عاجلې او بشپړې روغتیا هیله وکړه.
د المان د سولې کلي خیریه بنسټ استازي ین یېسن د ۴۶ ماشومانو له بشپړې درملنې وروسته د هغوی بېرته ستنېدل د خوښۍ وړ وبلل او ډاډ یې ورکړ چې المان ته د لېږل شویو نویو ناروغانو د درملنې بهیر به په ښه توګه پر مخ ولاړ شي.
نوموړي د ناروغو افغان ماشومانو د درملنې په برخه کې د افغاني سرې میاشتې او د المان د سولې کلي ترمنځ همکاري اغېزمنه وبلله او ویې ویل چې د افغاني سرې میاشتې له همکارۍ پرته د دې بهیر پر مخ وړل ستونزمن دي.
د یادونې وړ ده چې د ماشومانو د سپارلو پر مهال د هغوی کورنیو ته یو اندازه نغدي پیسې او درمل هم ورکړل شول.
افغاني سره میاشت د خپلو بشري او روغتیايي پروګرامونو له لارې له اړمنو کورنیو سره د ناروغو ماشومانو د درملنې په بهیر کې همکاري کوي او د خپلو نړیوالو کاري شریکانو په ملاتړ، د هغو ماشومانو د تخصصي درملنې زمینه برابروي چې په هېواد کې یې د درملنې امکانات محدود وي.
